活狲精作捣半年把 老百姓勿晓得哪能办 狄聂天，青村镇湾张村格徐阿姨开开心心办好事体回转去，一进门，喔唷，啥末事呀，房子里一天世界，台子浪摆拉格西瓜拉啥统统吃光，徐阿姨心里别别跳，不好哉，贼骨头来过哉，正在狄个辰光，伊看见仔一只活狲勒拉跳东跳西，喔，明白哉，原来是狄只活狲勒拉作捣，真是又气又好笑。 徐阿姨登拉一幢三层格小洋房里，狄只活狲一日到夜，一夜到天亮勒拉房子里搭仔房项浪窜东跳西，一看见陌生人就拔脚跑得无影无踪，活狲活相勒斜气，哪能捉得着呀。再讲，大家也晓得，活狲是国家二级保护动物，不可以拿伊弄煞格。正是落脱牙齿朝肚皮里咽。 狄只活狲末也一眼不识相，宅基浪杭尽人家烧格小菜，买格水果侪拨伊偷勃仔吃光，连得田里厢种格蔬菜也要去偷来吃脱，有格辰光，还要到田里去掰珠米，再爬到屋顶浪去吃。还要常桩吓小囡，更加郁气格是夜里厢还要挨家挨户笃窗。 徐阿姨为了求个太平，三日两横头到镇浪去买点苹果香蕉拉啥拨伊吃，吃仔末稍微好一眼。狄只活狲到湾张村已经半年多拉哉，蹓是蹓得来斜气，现在叫捉末捉勿着，每天拨伊爬上爬下调皮捣蛋，弄得鸡犬不宁，村民们实在头痛，大家要求动物保护部门动动脑筋，想想办法，早一眼把狄只活狲捉到动物园里，迭能样子，既保护了野生动物，又可以使村里格老百姓过正常格平静格生活。
